इनॉर्बिट मॉल वाशीत ‘टेस्ट ऑफ इनॉर्बिट’; खाद्य कार्यशाळा, खाण्याच्या स्पर्धांसह ‘फास्टर शेफ चॅलेंज’

नवी मुंबई : खाद्यपदार्थ म्हणजे केवळ चवीचा अनुभव न राहता त्यामागची निर्मिती प्रक्रिया जाणून घेण्याची आणि त्याचबरोबर काहीशा मैत्रीपूर्ण स्पर्धेचा आनंद घेण्याची संधी नवी मुंबईकरांना मिळणार आहे. गेल्या वर्षीच्या यशस्वी आयोजनानंतर इनॉर्बिट मॉल वाशीच्या वतीने यंदाही सप्टेंबरमध्ये ‘टेस्ट ऑफ इनॉर्बिट’चे आयोजन करण्यात आले आहे. २५ ते २७ सप्टेंबरदरम्यान होणाऱ्या या तीन दिवसीय उपक्रमात खाद्य कार्यशाळा, विविध खाद्यपदार्थांच्या खाण्याच्या स्पर्धा आणि महाविद्यालयीन विद्यार्थ्यांसाठी ‘फास्टर शेफ चॅलेंज’ अशा विविध उपक्रमांचा समावेश आहे. रेस्टॉरंट्स, खाद्यप्रेमी आणि महाविद्यालयीन विद्यार्थ्यांना एकत्र आणत खाद्यसंस्कृतीचा अनुभव अधिक संवादात्मक आणि मनोरंजक करण्याचा प्रयत्न या उपक्रमातून करण्यात आला आहे.

‘फूड मास्टरक्लासेस’च्या माध्यमातून सहभागी व्यक्तींना आपल्या आवडत्या खाद्यपदार्थ आणि पेयांच्या निर्मितीमागील प्रक्रिया प्रत्यक्ष जाणून घेता येणार आहे. २५ सप्टेंबर रोजी ‘९से१२’च्या वतीने मॉकटेल बनविण्याची कार्यशाळा आयोजित करण्यात आली आहे. त्यानंतर २६ सप्टेंबर रोजी ‘सिनोनास’च्या माध्यमातून पिझ्झा बनविण्याची कार्यशाळा होणार आहे. २७ सप्टेंबर रोजी ‘कोआ’च्या माध्यमातून सुशी बनविण्याची कार्यशाळा आयोजित करण्यात आली आहे. या सर्व कार्यशाळा दररोज सायंकाळी ४.३० ते रात्री ८.३० या वेळेत होणार असून, विविध खाद्यसंस्कृती आणि पाककलेच्या तंत्रांचा प्रत्यक्ष अनुभव घेण्याची संधी सहभागीांना मिळणार आहे.

खाद्यपदार्थांचा आस्वाद घेतानाच त्यात स्पर्धेची रंगत आणणाऱ्या ‘फूड चॅलेंजेस’मध्ये वेग आणि खाण्याची क्षमता यांची कसोटी लागणार आहे. २५ सप्टेंबर रोजी ‘एमओडी’च्या माध्यमातून डोनट खाण्याची स्पर्धा होणार आहे. २६ सप्टेंबर रोजी ‘चायनीज वोक’च्या सहकार्याने तिखट नूडल्स खाण्याची स्पर्धा आयोजित करण्यात आली आहे. तर २७ सप्टेंबर रोजी पाणीपुरी खाण्याची स्पर्धा होणार आहे. या सर्व खाद्यस्पर्धाही सायंकाळी ४.३० ते रात्री ८.३० या वेळेत होणार आहेत.

या उपक्रमाला तरुणाईची जोड देण्यासाठी २७ सप्टेंबर रोजी ‘फास्टर शेफ चॅलेंज’चे आयोजन करण्यात आले आहे. या स्पर्धेत महाविद्यालयीन विद्यार्थ्यांना सहभागी होऊन वेगवान पाककलेच्या आव्हानाला सामोरे जाण्याची संधी मिळणार आहे. वेग, कौशल्य आणि उत्स्फूर्ततेचा मिलाफ असलेल्या या आव्हानातून तरुण खाद्यप्रेमींना आपले पाककौशल्य दाखविता येणार आहे. महाविद्यालयीन विद्यार्थ्यांच्या सहभागामुळे संपूर्ण उपक्रमाला तरुणाईचा नवा आयाम मिळणार आहे.

मास्टरक्लासेस, खाद्यस्पर्धा आणि विद्यार्थ्यांचा सहभाग अशा विविध उपक्रमांच्या माध्यमातून ‘टेस्ट ऑफ इनॉर्बिट’मध्ये खाद्यपदार्थांचा अनुभव सामूहिक आणि अधिक रंजक करण्याचा प्रयत्न करण्यात आला आहे. स्वयंपाकातील सर्जनशीलता, स्पर्धेचा उत्साह आणि काहीतरी नवीन शिकण्याचा आनंद यांचा संगम या तीन दिवसीय उपक्रमातून साधला जाणार आहे.